Horóscopo da semana

Saxitario, o seu ascendente en Leo poñerá patas arriba o que tan ben parecía ter artellado.

Teña conta das súas orellas, sobre todo arredor do tres de decembro, data diabólica que simboliza o final da súa vida de sexo, drogas e rock&roll.

Brotaranlle responsabilidades de debaixo das pedras e non saberá facer outra cousa que afogar a crise dos 20 en alcol das feridas.

A alegría dos pasos cara adiante do galego do Bierzo, o ambiente efervescente dunha Compostela que sacude a alfombra vermella para cegar a flashes a Pilar López de Ayala, ou un Martin Sheen que fai o camiño e dá a volta ao colisionar co Playmobil... digo... co Papamóbil non serán motivos suficientes para apartala da súa única e descomunal fixación.

Terá pesadelos nos que é a protagonista do antes dun anuncio de Svenson, retrasará reloxos aumentando así a agonía a cada segundo restado, soñará con ouvir un clic en baixiño na clase das doce, e tentará chorar lembrándose da zapatilla da súa veciña de enfronte para non facelo por mor do que realmente lle anda na cabeza.

Asúmao, querida Saxitario, non son tempos de rexurdimento... Rosalía hoxe planta ¨higueritas¨ e vostede farase socia do Club del gourmet para que lle manden á casa un pack de Leffe tostada que beberá no seu sofá de coiro camel que terá medo de manchar co xeado de noces de macadamia.

Porén, de todo isto debe obter unha mensaxe positiva... dease de conta de que mil veces mellor é saír no horóscopo que nas esquelas.

Deste desbarre é culpable o que me impide ver máis canais que Localia e o Astrocanaltv, iso e a nosa crise compartida. Ademais, non todas as semanas a colaboradora activa do blog cambia de década...

... xa chocheo, que malas son as canas!

Pois iso, felicidades de parte do resto do equipazo, Tacada!